Arooz is now on the App Store, for iPhone and iPad. Download →

All poetry

ساون میں گھبرا جاتا ہے

Parveen Kumar Ashk (b. 1951)

ساون میں گھبرا جاتا ہے

دل میرا صحرا جاتا ہے

الف سمجھ میں آ جاوے تو

سب کچھ پڑھنا آ جاتا ہے

برف کا اک اک آنسو پی کر

دریا وجد میں آ جاتا ہے

اصل سفر ہے وہاں سے آگے

جہاں تلک رستہ جاتا ہے

لڑکی میلے میں تنہا تھی

سوچ کے دل بیٹھا جاتا ہے

جب میں جنگل ہو جاتا ہوں

مور ناچنے آ جاتا ہے

شاید اس نے دستک سن لی

دیکھو در کھلتا جاتا ہے

نیند کے بین بجاتے ہی اشکؔ

بستر میں سانپ آ جاتا ہے