نقاب اس نے رخ حسن زر پہ ڈال دیا

نقاب اس نے رخ حسن زر پہ ڈال دیا

کہ جیسے شب کا اندھیرا سحر پہ ڈال دیا

سماعتیں ہوئیں پر شوق حادثوں کے لیے

ذرا سا رنگ بیاں جب خبر پہ ڈال دیا

تمام اس نے محاسن میں عیب ڈھونڈ لیے

جو بار نقد و نظر دیدہ ور پہ ڈال دیا

اب اس کو نفع کہیں یا خسارۂ الفت

جو داغ اس نے دل معتبر پہ ڈال دیا

قریب و دور یہاں ہم سفر نہیں کوئی

تری طلب نے یہ کس رہ گزر پہ ڈال دیا

حصول منزل جاناں سے ہاتھ دھو لیں گے

کچھ اور بوجھ جو پائے سفر پہ ڈال دیا

جو ہم عذاب تھا اس کی ہی چھاؤں میں آ کر

خود اپنی دھوپ کا لشکر شجر پہ ڈال دیا

بھٹک رہا تھا جو اسرار فن کی وادی میں

عروج دے کے فراز ہنر پہ ڈال دیا

بے اعتدال تھے خود ان کے خط و خال ظفرؔ

ہر اتہام مگر شیشہ گر پہ ڈال دیا

naqab us ne rukh-e-husn zar pe dal diya

ke jaise shab ka andhera sahar pe dal diya

samaaten huin par shauq hadson ke liye

zara sa rang-e-bayan jab khabar pe dal diya

tamam us ne mahasin mein aib dhund liye

jo bar naqd-o-nazar dida war pe dal diya

ab us ko nafa kahin ya khasara-e-ulfat

jo dagh us ne dil motabar pe dal diya

qarib-o-dur yahan ham safar nahin koi

tiri talab ne ye kis rah guzar pe dal diya

husul-e-manzil janan se hath dho lenge

kuchh aur bojh jo pae safar pe dal diya

jo ham azab tha us ki hi chhaon mein a kar

khud apni dhup ka lashkar shajar pe dal diya

bhatak raha tha jo asrar-e-fan ki wadi mein

uruj de ke faraz-e-hunar pe dal diya

be etidal the khud un ke khat-o-khal zafar

har ittiham magar shisha gar pe dal diya