تمام رنگ جہاں التجا کے رکھے تھے

تمام رنگ جہاں التجا کے رکھے تھے

لہو لہو وہیں منظر انا کے رکھے تھے

کرم کے ساتھ ستم بھی بلا کے رکھے تھے

ہر ایک پھول نے کانٹے چھپا کے رکھے تھے

سکون چہرے پہ ہر خوش ادا کے رکھے تھے

سمندروں نے بھی تیور چھپا کے رکھے تھے

مری امید کا سورج کہ تیری آس کا چاند

دیے تمام ہی رخ پر ہوا کے رکھے تھے

وہ جس کی پاک اڑانوں کے معترف تھے سب

جلے ہوئے وہی شہپر حیا کے رکھے تھے

بنا یزید زمانہ جو میں حسین بنا

کہ ظلم باقی ابھی کربلا کے رکھے تھے

انہیں کو توڑ گیا ہے خلوص کا چہرہ

جو چند آئنے ہم نے بچا کے رکھے تھے

یوں ہی کسی کی کوئی بندگی نہیں کرتا

بتوں کے چہروں پہ تیور خدا کے رکھے تھے

گئے ہیں باب رسا تک وہ دستکیں بن کر

ظفرؔ جو ہاتھ پہ آنسو دعا کے رکھے تھے

tamam rang-e-jahan iltija ke rakhe the

lahu lahu wahin manzar ana ke rakhe the

karam ke sath sitam bhi bala ke rakhe the

har ek phul ne kante chhupa ke rakhe the

sukun chehre pe har khush ada ke rakhe the

samundaron ne bhi tewar chhupa ke rakhe the

miri umid ka suraj ke teri as ka chand

diye tamam hi rukh par hawa ke rakhe the

wo jis ki pak uranon ke motarif the sab

jale hue wahi shahpar haya ke rakhe the

bana yazid zamana jo main hasin bana

ke zulm baqi abhi karbala ke rakhe the

unhen ko tor gaya hai khulus ka chehra

jo chand aine ham ne bacha ke rakhe the

yun hi kisi ki koi bandagi nahin karta

buton ke chehron pe tewar khuda ke rakhe the

gae hain bab-e-rasa tak wo dastaken ban kar

zafar jo hath pe ansu dua ke rakhe the