بڑھے کچھ اور کسی التجا سے کم نہ ہوئے

بڑھے کچھ اور کسی التجا سے کم نہ ہوئے

مرے حریف تمہاری دعا سے کم نہ ہوئے

سیاہ رات میں دل کے مہیب سناٹے

خروش نغمۂ شعلہ نوا سے کم نہ ہوئے

وطن کو چھوڑ کے ہجرت بھی کس کو راس آئی

مسائل ان کے وہاں بھی ذرا سے کم نہ ہوئے

فراز خلق سے اپنا لہو بھی برسایا

غبار پھر بھی دلوں کی فضا سے کم نہ ہوئے

بلند اور لویں ہو گئیں امیدوں کی

دیے وفا کے تمہاری جفا سے کم نہ ہوئے

بھنور میں ڈوب کے تاریخ بن گئے گویا

سفینے عشق کے سیل بلا سے کم نہ ہوئے

ہمارے ذہن بھٹکتے رہے خلاؤں میں

سفر نصیب کے زنجیر پا سے کم نہ ہوئے

سدا بہار خیابان آرزو تھا ظفرؔ

لہو کے پھول ہماری قبا سے کم نہ ہوئے

barhe kuchh aur kisi iltija se kam na hue

mire harif tumhari dua se kam na hue

siyah rat mein dil ke muhib sannate

kharosh naghma-e-shola nawa se kam na hue

watan ko chhor ke hijrat bhi kis ko ras ai

masail un ke wahan bhi zara se kam na hue

faraz khalq se apna lahu bhi barsaya

ghubar phir bhi dilon ki faza se kam na hue

buland aur lawen ho gain ummidon ki

diye wafa ke tumhari jafa se kam na hue

bhanwar mein dub ke tarikh ban gae goya

safine ishq ke sail-e-bala se kam na hue

hamare zehn bhatakte rahe khalaon mein

safar nasib ke zanjir pa se kam na hue

sada bahar khiyaban-e-arzu tha zafar

lahu ke phul hamari qaba se kam na hue