ہر انتخاب یہاں ماضی و عقب کا ہے

ہر انتخاب یہاں ماضی و عقب کا ہے

سوال میرا نہیں ہے مرے نسب کا ہے

شعور لوح و قلم سے ظہور محفل تک

ہر ایک بے ادبی پر لباس ادب کا ہے

نہ کوئی داد نہ تحسین صرف خاموشی

مرے سخن پہ تیرا تبصرہ غضب کا ہے

ہو ایک فرد تو ہو فرد جرم بھی آید

ستم گری تو یہاں کاروبار سب کا ہے

اگا نہیں کوئی سورج مرے مقدر کا

دنوں پہ جیسے مسلط عتاب شب کا ہے

تمام زحمتیں میرے گناہ کے سائے

تمام راحتیں انعام میرے رب کا ہے

ظفر غزل ہے کہ زخموں کی حاشیہ بندی

نہ خال و خط کا کوئی تذکرہ نہ لب کا ہے

har intikhab yahan mazi-o-aqab ka hai

sawal mera nahin hai mire nasab ka hai

shuur-e-lauh-o-qalam se zuhur mahfil tak

har ek be adabi par libas adab ka hai

na koi dad na tahsin sirf-e-khamoshi

mire sukhan pe tera tabsira ghazab ka hai

ho ek fard to ho fard-e-jurm bhi aed

sitam giri to yahan karobar sab ka hai

uga nahin koi suraj mire muqaddar ka

dinon pe jaise musallat itab shab ka hai

tamam zahmaten mere gunah ke sae

tamam rahaten inam mere rab ka hai

zafar ghazal hai ke zakhmon ki hashiya bandi

na khal-o-khat ka koi tazkira na lab ka hai