حرف تدبیر نہ تھا حرف دلاسہ روشن

حرف تدبیر نہ تھا حرف دلاسہ روشن

میں جو ڈوبا تو ہوا ساحل دریا روشن

عہد میں اپنے مسلط ہے اندھیروں کا عذاب

طاق میں وقت کے رکھ دو کوئی لمحہ روشن

یوسف آسا سر بازار ہیں رسوا لیکن

وادیٔ عشق میں ہے عزم زلیخا روشن

جو مری ماں نے دیا رخت سفر کی صورت

میرے ماتھے پہ ابھی تک ہے وہ بوسہ روشن

تیر اندھیروں کے مجھے زد میں لیے بیٹھے ہیں

جیسے اس بزم میں ہوں میں ہی اکیلا روشن

عین ممکن ہے پگھل جائیں اندھیرے دل کے

اے ظفرؔ ایسے میں ہو گر کوئی نغمہ روشن

harf-e-tadbir na tha harf dilasa raushan

main jo duba to hua sahil-e-dariya raushan

ahd main apne musallat hai andheron ka azab

taq mein waqt ke rakh do koi lamha raushan

yusuf asa sar-e-bazar hain ruswa lekin

wadi-e-ishq mein hai azm-e-zulekha raushan

jo miri man ne diya rakht-e-safar ki surat

mere mathe pe abhi tak hai wo bosa raushan

tir andheron ke mujhe zad mein liye baithe hain

jaise is bazm mein hun main hi akela raushan

ain mumkin hai pighal jaen andhere dil ke

ai zafar aise mein ho gar koi naghma raushan