نگاہ حسن مجسم ادا کو چھوتے ہی

نگاہ حسن مجسم ادا کو چھوتے ہی

گنوائے ہوش بھی اس دل ربا کو چھوتے ہی

تمام پھول مہکنے لگے ہیں کھل کھل کر

چمن میں شوخی باد صبا کو چھوتے ہی

مشام جاں میں عجب ہے سرور کا عالم

تصورات میں زلف دوتا کو چھوتے ہی

نگاہ شوق کی سب انگلیاں سلگ اٹھیں

گلاب جسم کی رنگیں قبا کو چھوتے ہی

نظر کو ہیچ نظر آئے سب حسیں منظر

بس اک شعاع رخ جاں فزا کو چھوتے ہی

جو آنسووں سے ہوئی با وضو اکیلے میں

در قبول کھلا اس دعا کو چھوتے ہی

نہائیں شدت احساس کے اجالے میں

سماعتیں مرے سوز نوا کو چھوتے ہی

حصار ضبط جو ٹوٹا تو آنکھ بھر آئی

دیار غیر میں اک آشنا کو چھوتے ہی

لہو میں ڈوب کے کانٹے بنے چراغ ظفرؔ

رہ وفا میں ہم آشفتہ پا کو چھوتے ہی

nigah-e-husn-e-mujassam ada ko chhute hi

ganwae hosh bhi is dil ruba ko chhute hi

tamam phul mahakne lage hain khul khul kar

chaman mein shokhi bad-e-saba ko chhute hi

masham-e-jan mein ajab hai surur ka alam

tasawwurat mein zulf-e-duta ko chhute hi

nigah-e-shauq ki sab ungliyan sulag uthen

gulab jism ki rangin qaba ko chhute hi

nazar ko hech nazar ae sab hasin manzar

bas ik shua-e-rukh jan faza ko chhute hi

jo ansiwon se hui ba wuzu akele mein

dar-e-qubul khula is dua ko chhute hi

nahaen shiddat-e-ehsas ke ujale mein

samaaten mire soz-e-nawa ko chhute hi

hisar-e-zabt jo tuta to ankh bhar ai

dayar-e-ghair mein ik ashna ko chhute hi

lahu mein dub ke kante bane charagh zafar

rah-e-wafa mein ham ashufta pa ko chhute hi