خوش گماں ہر آسرا بے آسرا ثابت ہوا

خوش گماں ہر آسرا بے آسرا ثابت ہوا

زندگی تجھ سے تعلق کھوکھلا ثابت ہوا

جب شکایت کی کبیدہ خاطری حاصل ہوئی

صبر محرومی مرا حرف دعا ثابت ہوا

بے طلب ملتی رہیں یوں تو ہزاروں نعمتیں

تھے طلب کی آس میں برہم تو کیا ثابت ہوا

روبرو ہوتے ہوئے بھی ہم رہے منزل سے دور

اک انا کا مسئلہ زنجیر پا ثابت ہوا

آہ بھر کر چل دیے سب ہی تماشہ دیکھ کر

وقت پر جو ڈٹ گیا وہ دیوتا ثابت ہوا

ٹوٹ کر بکھرا مرے دل سے یقیں کا آئنہ

میں اسے سمجھا تھا کیا لیکن وہ کیا ثابت ہوا

سانس جو آیا بدن میں تھا وفا سے ہم کنار

اور جب واپس ہوا تو بے وفا ثابت ہوا

سر کے شیدائی بہت مایوس محفل سے اٹھے

جب ظفرؔ جیسا سخن ور بے نوا ثابت ہوا

khush guman har asra be asra sabit hua

zindagi tujh se taalluq khokhla sabit hua

jab shikayat ki kabida khatiri hasil hui

sabr mahrumi mira harf-e-dua sabit hua

be talab milti rahen yun to hazaron nematen

the talab ki as mein barham to kya sabit hua

rubaru hote hue bhi ham rahe manzil se dur

ik ana ka masala zanjir-e-pa sabit hua

ah bhar kar chal diye sab hi tamasha dekh kar

waqt par jo dat gaya wo dewta sabit hua

tut kar bikhra mire dil se yaqin ka aina

main use samjha tha kya lekin wo kya sabit hua

sans jo aya badan mein tha wafa se ham kanar

aur jab wapas hua to be wafa sabit hua

sar ke shaidai bahut mayus mahfil se uthe

jab zafar jaisa sukhan war be nawa sabit hua