کبھی دعا تو کبھی بد دعا سے لڑتے ہوئے

کبھی دعا تو کبھی بد دعا سے لڑتے ہوئے

تمام عمر گزاری ہوا سے لڑتے ہوئے

ہوئے نہ زیر کسی انتہا سے لڑتے ہوئے

محاذ ہار گئے ہم قضا سے لڑتے ہوئے

بکھر رہا ہوں فضا میں غبار کی صورت

خلاف مصلحت اپنی انا سے لڑتے ہوئے

فضا بدلتے ہی جاگ اٹھی فطرت مے کش

شکست کھا گئی توبہ گھٹا سے لڑتے ہوئے

قلم کی نوک سے بہتا رہا لہو میرا

حصار خلقت فکر رسا سے لڑتے ہوئے

جنوں نورد کو منظر نہ کوئی راس آیا

مرا تو شوخی آب و ہوا سے لڑتے ہوئے

پہنچ سکے نہ کسی خوش گوار منزل تک

تمہاری یاد کی زنجیر پا سے لڑتے ہوئے

انہیں پہ بند ہوا ارتقا کا دروازہ

فنا ہوئے ہیں جو اپنی بقا سے لڑتے ہوئے

ظفرؔ گھرے تو اسی رزم گاہ ہستی میں

ہوئے شہید صف کربلا سے لڑتے ہوئے

kabhi dua to kabhi bad dua se larte hue

tamam umr guzari hawa se larte hue

hue na zer kisi intiha se larte hue

mahaz har gae ham qaza se larte hue

bikhar raha hun faza mein ghubar ki surat

khilaf-e-maslahat apni ana se larte hue

faza badalte hi jag uthi fitrat-e-mai kash

shikast kha gai tauba ghata se larte hue

qalam ki nok se bahta raha lahu mera

hisar-e-khilqat fikr-e-rasa se larte hue

junun naward ko manzar na koi ras aya

mira to shokhi ab-o-hawa se larte hue

pahunch sake na kisi khush gawar-e-manzil tak

tumhari yad ki zanjir pa se larte hue

unhen pe band hua irtiqa ka darwaza

fana hue hain jo apni baqa se larte hue

zafar ghire to isi razm gah-e-hasti mein

hue shahid-e-saf karbala se larte hue