Arooz is now on the App Store, for iPhone and iPad. Download →

All poetry

جو خود نہ اپنے ارادے سے بد گماں ہوتا

Aal-e-Raza Raza (1896–1978)

جو خود نہ اپنے ارادے سے بد گماں ہوتا

قدم اٹھاتے ہی منزل پہ کارواں ہوتا

یہ لطف ان کے تغافل میں پھر کہاں ہوتا

جو اک لطیف تبسم نہ درمیاں ہوتا

کھلے ہیں پھول جو ایسے میں تم چلے آتے

یہ اہتمام بہاراں نہ رائیگاں ہوتا

دماغ عرش پہ ہے جس کی دھن میں وہ سجدہ

مرے نصیب میں ہوتا تو میں کہاں ہوتا

سمجھ تو یہ کہ نہ سمجھے خود اپنا رنگ جنوں

مزاج یہ کہ زمانہ مزاج داں ہوتا

بھری بہار کے دن ہیں خیال آ ہی گیا

اجڑ نہ جاتا تو پھولوں میں آشیاں ہوتا

حسین قدموں سے لپٹی ہوئی کشش تھی جہاں

وہیں تھا دل بھی رضاؔ اور دل کہاں ہوتا