پہونچی نہ دل کی بات حدود پیام تک

پہونچی نہ دل کی بات حدود پیام تک

باقی ہیں ان پہ کتنے جواب سلام تک

بت خانہ ساز رنگ زمانہ ہے کس قدر

چھوڑا نہ اس نے کعبۂ عالی مقام تک

مانوس ہو رہے ہیں تری جلوہ گاہ سے

پہونچے ابھی ہیں منزل ماہ تمام تک

جب تک رہے وہ میری نگاہوں کے سامنے

ٹھہری نہ ایک رخ سے ادائے خرام تک

دل دے کے ان کو آپ سے ایسے گزر گئے

جیسے کہ ہم تھے صرف اسی انتظام تک

انجام کار شب کے اندھیرے میں لٹ گیا

رکھا تھا کیف صبح بچا کر جو شام تک

اس طرح کر رہے ہیں رضاؔ کا وہ تذکرہ

خالی نہیں ہے طنز سے حسن کلام تک

pahunchi na dil ki bat hudud-e-payam tak

baqi hain un pe kitne jawab-e-salam tak

but khana saz rang-e-zamana hai kis qadar

chhora na us ne kaaba-e-ali maqam tak

manus ho rahe hain tiri jalwa gah se

pahunche abhi hain manzil mah-e-tamam tak

jab tak rahe wo meri nigahon ke samne

thahri na ek rukh se ada-e-khiram tak

dil de ke un ko ap se aise guzar gae

jaise ke ham the sirf isi intizam tak

anjam-e-kar shab ke andhere mein lut gaya

rakha tha kaif-e-subh bacha kar jo sham tak

is tarah kar rahe hain raza ka wo tazkira

khali nahin hai tanz se husn-e-kalam tak