سفر میں دھوپ ہے تو سائبان بھی ہوگا

سفر میں دھوپ ہے تو سائبان بھی ہوگا

زمین ہوگی جہاں آسمان بھی ہوگا

خبر کہاں تھی کہ یہ روح ایک مسجد ہے

سیہ وجود میں نور اذان بھی ہوگا

ترے بدن پہ یہ بوڑھا سفید سر کیسا

جدید بچے بتا کیا جوان بھی ہوگا

مری پسند کے افراد جس میں رہتے ہیں

زمیں پہ ایسا کوئی خاندان بھی ہوگا

سنا ہے شہر خموشاں میں آ گیا ہوں میں

یہیں کہیں کوئی میرا مکان بھی ہوگا

وہ مجھ سے بچھڑا میں رو دھو کے اشکؔ بھول گیا

پتا نہیں تھا کہ دل پر نشان بھی ہوگا

safar mein dhup hai to saiban bhi hoga

zamin hogi jahan asman bhi hoga

khabar kahan thi ke ye ruh ek masjid hai

siyah wajud mein nur-e-azan bhi hoga

tire badan pe ye burha safed sar kaisa

jadid bachche bata kya jawan bhi hoga

miri pasand ke afrad jis mein rahte hain

zamin pe aisa koi khandan bhi hoga

suna hai shahr-e-khamoshan mein a gaya hun main

yahin kahin koi mera makan bhi hoga

wo mujh se bichhra mein ro dho ke ashk bhul gaya

pata nahin tha ke dil par nishan bhi hoga