قریب کچھ نہ ملا دور سے دھواں دیکھا

قریب کچھ نہ ملا دور سے دھواں دیکھا

قفس سے چھوٹ کے کیا خوب آشیاں دیکھا

یہی ہے سیر فقیروں کی اور یہی فریاد

زمیں پہ بیٹھ گئے سوئے آسماں دیکھا

ہوئے تمام جو سجدے تھے دور کے آداب

یہاں سے اور ہے عالم کہ آستاں دیکھا

حصار کھینچ کے اپنے ہی دل کا بیٹھ رہے

زمانے بھر کو محبت سے بد گماں دیکھا

چمن چمن تری سیریں نظر بہار بہار

چٹک چٹک پڑے غنچے جہاں جہاں دیکھا

حریم ناز پہ وہ رنگ و نور کی بارش

حریم ناز میں کیا تھا یہ پھر کہاں دیکھا

رضاؔ نے دل کو سجا کر ترے تصور سے

جہان حسن میں اک حسن دو جہاں دیکھا

qarib kuchh na mila dur se dhuan dekha

qafas se chhut ke kya khub ashiyan dekha

yahi hai sair faqiron ki aur yahi fariyad

zamin pe baith gae su-e-asman dekha

hue tamam jo sajde the dur ke adab

yahan se aur hai alam ke astan dekha

hisar khinch ke apne hi dil ka baith rahe

zamane bhar ko mohabbat se bad guman dekha

chaman chaman tiri sairen nazar bahar bahar

chutak chutak pare ghunche jahan jahan dekha

harim-e-naz pe wo rang-o-nur ki barish

harim-e-naz mein kya tha ye phir kahan dekha

raza ne dil ko saja kar tire tasawwur se

jahan-e-husn mein ik husn do jahan dekha