موسم سوکھے پیڑ گرانے والا تھا

موسم سوکھے پیڑ گرانے والا تھا

کسی کسی میں پھول بھی آنے والا تھا

پار کے منظر نے موقعے پر آنکھیں دیں

میں اندھا دیوار اٹھانے والا تھا

اس نے بھی آنکھوں میں آنسو روک لیے

میں بھی اپنے زخم چھپانے والا تھا

تم نے کیوں بارود بچھا دی دھرتی پر

میں تو دعا کا شہر بسانے والا تھا

وہ لڑکی تو کب کی مر گئی یاد آیا

میں کس کو آواز لگانے والا تھا

گھر کے چراغ نے آگ لگا دی بستی میں

میں سورج دہلیز پہ لانے والا تھا

میری دنیا کیسے اس کو راس آتی ہے

اس کا ہر انداز زمانے والا تھا

بچے اشکؔ کو پاگل کہہ کر بھاگ گئے

وہ پریوں کی کتھا سنانے والا تھا

mausam sukhe per girane wala tha

kisi kisi mein phul bhi ane wala tha

par ke manzar ne mauqae par ankhen den

main andha diwar uthane wala tha

us ne bhi ankhon mein ansu rok liye

main bhi apne zakhm chhupane wala tha

tum ne kyun barud bichha di dharti par

main to dua ka shahr basane wala tha

wo larki to kab ki mar gai yad aya

main kis ko awaz lagane wala tha

ghar ke charagh ne ag laga di basti mein

main suraj dahliz pe lane wala tha

meri duniya kaise us ko ras ati hai

us ka har andaz zamane wala tha

bachche ashk ko pagal kah kar bhag gae

wo pariyon ki kattha sunane wala tha