میں ریت کا محل ہوں مرے پاسباں درخت

میں ریت کا محل ہوں مرے پاسباں درخت

سینے پہ روک لیتے ہیں سب آندھیاں درخت

دیکھے گئے تھے جس کے تلے دو جواں بدن

لوگوں نے ٹکڑے ٹکڑے کیا وہ جواں درخت

ڈھونڈیں گے اب پرند کہاں شام کو پناہ

جنگل کی آگ کھا گئی سب ڈالیاں درخت

پھل دار تھا تو گاؤں اسے پوجتا رہا

سوکھا تو قتل ہو گیا وہ بے زباں درخت

سورج تھا دکھ کا سر پہ کہ تھیں غم کی بارشیں

دشت سفر میں میرے بنے سائباں درخت

کیسی ہوا چلی ہے کہ پھر چیخ چیخ کر

سب کو سنا گئے ہیں مری داستاں درخت

سو بار میرے جسم کو چھو کر گئی بہار

پھر بھی ہوں اشکؔ سوکھا ہوا نیم جاں درخت

main ret ka mahal hun mire pasban darakht

sine pe rok lete hain sab andhiyan darakht

dekhe gae the jis ke tale do jawan badan

logon ne tukre tukre kya wo jawan darakht

dhundenge ab parind kahan sham ko panah

jangal ki ag kha gai sab daliyan darakht

phal dar tha to gaon use pujta raha

sukha to qatl ho gaya wo be zaban darakht

suraj tha dukh ka sar pe ke thin gham ki barishen

dasht-e-safar mein mere bane saiban darakht

kaisi hawa chali hai ke phir chikh chikh kar

sab ko suna gae hain miri dastan darakht

sau bar mere jism ko chhu kar gai bahar

phir bhi hun ashk sukha hua nim jan darakht