بھاگتے سورج کو پیچھے چھوڑ کر جائیں گے ہم

بھاگتے سورج کو پیچھے چھوڑ کر جائیں گے ہم

شام کے ہوتے ہی واپس اپنے گھر جائیں گے ہم

کاٹنے کو ایک شب ٹھہرے ہیں تیرے شہر میں

کیا بتائیں صبح ہوگی تو کدھر جائیں گے ہم

دھوپ میں پھولوں سا مرجھا بھی گئے تو کیا ہوا

شہر سے ہونٹوں کے پیمانے تو بھر جائیں گے ہم

آج گردوں کی بلندی ناپنے میں محو ہیں

کل کسی گہرے سمندر میں اتر جائیں گے ہم

ڈھونڈتے کھویا ہوا چہرہ کسی شیشے میں کیوں

جانتے گر یہ کہ سائے سے بھی ڈر جائیں گے ہم

کچھ ہمارا حال بھی خاورؔ ہے کندن کی طرح

دکھ کے شعلوں میں جلیں گے تو نکھر جائیں گے ہم

bhagte suraj ko pichhe chhor kar jaenge ham

sham ke hote hi wapas apne ghar jaenge ham

katne ko ek shab thahre hain tere shahr mein

kya bataen subh hogi to kidhar jaenge ham

dhup mein phulon sa murjha bhi gae to kya hua

shahr se honton ke paimane to bhar jaenge ham

aj gardun ki bulandi napne mein mahw hain

kal kisi gahre samundar mein utar jaenge ham

dhundte khoya hua chehra kisi shishe mein kyun

jante gar ye ke sae se bhi dar jaenge ham

kuchh hamara hal bhi khawar hai kundan ki tarah

dukh ke sholon mein jalenge to nikhar jaenge ham