جلے ہیں دل نہ چراغوں نے روشنی کی ہے

جلے ہیں دل نہ چراغوں نے روشنی کی ہے

وہ شب پرستوں نے محفل میں تیرگی کی ہے

حدیث ظلم و ستم ہے ہنوز نا گفتہ

ہنوز مہر زبانوں پہ خامشی کی ہے

اس ایک جام نے ساقی کی جو عطا ٹھہرا

سکوں دیا ہے نہ کچھ درد میں کمی کی ہے

ہمیں یہ ناز نہ کیوں ہو کہ نے نواز ہیں ہم

ہمارے ہونٹوں نے ایجاد نغمگی کی ہے

چمن میں صرف ہمیں راز داں ہیں کانٹوں کے

گلوں کے ساتھ بسر ہم نے زندگی کی ہے

فراق یار نے بخشی ہے وصل کی لذت

خیال یار نے ظلمت میں روشنی کی ہے

ہیں جس کی دید سے محروم آج تک خاورؔ

اسی کی ہم نے تصور میں بندگی کی ہے

jale hain dil na charaghon ne raushni ki hai

wo shab paraston ne mahfil mein tirgi ki hai

hadis-e-zulm-o-sitam hai hanoz na gufta

hanoz mehr zabanon pe khamushi ki hai

us ek jam ne saqi ki jo ata thahra

sukun diya hai na kuchh dard mein kami ki hai

hamen ye naz na kyun ho ke ne nawaz hain ham

hamare honton ne ijad naghmagi ki hai

chaman mein sirf hamen raz dan hain kanton ke

gulon ke sath basar ham ne zindagi ki hai

firaq-e-yar ne bakhshi hai wasl ki lazzat

khayal-e-yar ne zulmat mein raushni ki hai

hain jis ki did se mahrum aj tak khawar

usi ki ham ne tasawwur mein bandagi ki hai