محسوس ہو رہا ہے جو غم میری ذات کا

محسوس ہو رہا ہے جو غم میری ذات کا

سچ پوچھیے تو درد ہے وہ کائنات کا

گھر کی گھٹن سے دور نکل جائے آدمی

سڑکوں پہ خوف ہو نہ اگر حادثات کا

اپنے بدن کو اور تھکاؤ نہ دوستو

ڈھل جائے دن تو بوجھ اٹھانا ہے رات کا

اک دوسرے کو زہر پلاتے ہیں لوگ اب

باتوں میں شہد گھول کے قند و نبات کا

ہر شخص تیرے شہر میں مجرم بنا ہوا

پھرتا ہے ڈھونڈھتا ہوا رشتہ نجات کا

اس میں کسی کا عکس نہ چہرہ دکھائی دے

دھندلا گیا ہے آئنہ خاورؔ حیات کا

mahsus ho raha hai jo gham meri zat ka

sach puchhiye to dard hai wo kainat ka

ghar ki ghutan se dur nikal jae admi

sarkon pe khauf ho na agar hadsat ka

apne badan ko aur thakao na dosto

dhal jae din to bojh uthana hai rat ka

ik dusre ko zahr pilate hain log ab

baton mein shahd ghol ke qand-o-nabat ka

har shakhs tere shahr mein mujrim bana hua

phirta hai dhundhta hua rishta najat ka

is mein kisi ka aks na chehra dikhai de

dhundla gaya hai aina khawar hayat ka