روشنی ہی روشنی ہے شہر میں

روشنی ہی روشنی ہے شہر میں

پھر بھی گویا تیرگی ہے شہر میں

روز و شب کے شور و غل کے باوجود

اک طرح کی خامشی ہے شہر میں

ریل کی پٹری پہ سو جاتے ہیں لوگ

کتنی آساں خود کشی ہے شہر میں

جو عمارت ہے وہ سر سے پاؤں تک

اشتہاروں سے سجی ہے شہر میں

گاؤں چھوڑے ہو چکی مدت مگر

خاورؔ اب تک اجنبی ہے شہر میں

raushni hi raushni hai shahr mein

phir bhi goya tirgi hai shahr mein

roz-o-shab ke shor-o-ghul ke bawajud

ik tarah ki khamushi hai shahr mein

rel ki patri pe so jate hain log

kitni asan khud kashi hai shahr mein

jo imarat hai wo sar se paon tak

ishtiharon se saji hai shahr mein

gaon chhore ho chuki muddat magar

khawar ab tak ajnabi hai shahr mein