میرے مکاں سے کاش یہ منظر دکھائی دے
Badiuzzaman Khawar (1938–1990)میرے مکاں سے کاش یہ منظر دکھائی دے
ہریالیوں کے بیچ ترا گھر دکھائی دے
چہرہ کسی کا چاہے لگے ماہتاب سا
جاؤ نہ اتنے پاس کہ پتھر دکھائی دے
اس شخص کو صداؤں سے پہچان جائیے
جس شخص کا نہ جسم نہ پیکر دکھائی دے
آتا ہے اور کون ہوا کے سوا یہاں
اس دشت میں کہاں سے کوئی گھر دکھائی دے
تو میری ذات میں کبھی جھانکے تو کیا عجب
تیرے سوا نہ کچھ مرے اندر دکھائی دے
زخموں کو ناپ لیتا ہے کس طرح دیکھیے
یہ دل جو بحر غم کا شناور دکھائی دے
چل کر اب ایسے شہر میں کچھ دن گزاریے
خاورؔ جہاں نہ کوئی سخنور دکھائی دے
mere makan se kash ye manzar dikhai de
hariyaliyon ke bich tira ghar dikhai de
chehra kisi ka chahe lage mahtab sa
jao na itne pas ke patthar dikhai de
us shakhs ko sadaon se pahchan jaiye
jis shakhs ka na jism na paikar dikhai de
ata hai aur kaun hawa ke siwa yahan
is dasht mein kahan se koi ghar dikhai de
tu meri zat mein kabhi jhanke to kya ajab
tere siwa na kuchh mire andar dikhai de
zakhmon ko nap leta hai kis tarah dekhiye
ye dil jo bahr-e-gham ka shanaor dikhai de
chal kar ab aise shahr mein kuchh din guzariye
khawar jahan na koi sukhanwar dikhai de