کب بیاباں راہ میں آیا یہ سمجھا ہی نہیں

کب بیاباں راہ میں آیا یہ سمجھا ہی نہیں

چلتے رہنے کے سوا دھیان اور کچھ تھا ہی نہیں

کرب منزل کا ہو کیا احساس ان اشجار کو

جن کے سائے میں مسافر کوئی ٹھہرا ہی نہیں

کس کو بتلاتے کہ آئے ہیں کہاں سے کون ہیں

ہم فقیروں کا کسی نے حال پوچھا ہی نہیں

کیا طلب کرتا کسی سے زندگی کا خوں بہا

مجرموں میں میرا قاتل کوئی نکلا ہی نہیں

بے تحاشا پیار کی دولت لٹائی عمر بھر

دوستی کا ہم نے کچھ انجام سوچا ہی نہیں

گھومتا پایا گیا تھا شہر میں وہ ایک دن

پھر کسی نے تیرے دیوانے کو دیکھا ہی نہیں

دوستو خاورؔ سنائے کیا تمہیں تازہ غزل

مدتوں سے اس نے کوئی شعر لکھا ہی نہیں

kab bayaban rah mein aya ye samjha hi nahin

chalte rahne ke siwa dhyan aur kuchh tha hi nahin

karb manzil ka ho kya ehsas un ashjar ko

jin ke sae mein musafir koi thahra hi nahin

kis ko batlate ke ae hain kahan se kaun hain

ham faqiron ka kisi ne hal puchha hi nahin

kya talab karta kisi se zindagi ka khun baha

mujrimon mein mera qatil koi nikla hi nahin

be tahasha pyar ki daulat lutai umr bhar

dosti ka ham ne kuchh anjam socha hi nahin

ghumta paya gaya tha shahr mein wo ek din

phir kisi ne tere diwane ko dekha hi nahin

dosto khawar sunae kya tumhen taza ghazal

muddaton se us ne koi sher likha hi nahin