سورج بھی سر پہ ہو تو اسے سائباں کہیں

سورج بھی سر پہ ہو تو اسے سائباں کہیں

اب دشت ہی کو آؤ ہم اپنا مکاں کہیں

ہوں ایک آسمان و زمیں جس جگہ وہاں

سمجھیں کسے زمین کسے آسماں کہیں

رندوں کو میکدے کی سیاست سے کیا غرض

جو بھی پلائے ہم اسے پیر مغاں کہیں

چپ بیٹھ کر بھی دوستو کٹتی کہاں ہے رات

اس خاموشی میں کیوں نہ کوئی داستاں کہیں

جب وہ ہر ایک شے میں ہے جلوہ نما تو پھر

کیا بات ہے کہ لوگ اسے بے نشاں کہیں

کھلتا نہیں کہ کون ہمارا حریف ہے

آتا نہیں سمجھ میں کسے مہرباں کہیں

ذرہ بھی ہے لیے ہوئے صحرا کی وسعتیں

قطرہ بھی ہے وہ بحر جسے بے کراں کہیں

بے ساختہ نکل تو پڑی ہے صدائے دل

اب لوگ اس کو گیت کہیں یا فغاں کہیں

خاورؔ جب اس کی گود کے پالے ہوئے ہیں ہم

پھر کیوں نہ اپنے دیس کو ہم اپنی ماں کہیں

suraj bhi sar pe ho to use saiban kahin

ab dasht hi ko ao ham apna makan kahin

hun ek asman-o-zamin jis jagah wahan

samjhen kise zamin kise asman kahin

rindon ko maikade ki siyasat se kya gharaz

jo bhi pilae ham use pir-e-mughan kahin

chup baith kar bhi dosto katti kahan hai rat

is khamoshi mein kyun na koi dastan kahin

jab wo har ek shai mein hai jalwa numa to phir

kya bat hai ke log use be nishan kahin

khulta nahin ke kaun hamara harif hai

ata nahin samajh mein kise mehrban kahin

zarra bhi hai liye hue sahra ki wusaten

qatra bhi hai wo bahr jise be karan kahin

be sakhta nikal to pari hai sada-e-dil

ab log us ko git kahin ya fughan kahin

khawar jab us ki god ke pale hue hain ham

phir kyun na apne des ko ham apni man kahin