اتنی سی آنکھ نے غم کتنا اٹھا لیا ہے

اتنی سی آنکھ نے غم کتنا اٹھا لیا ہے

کشتی نے اپنے اندر دریا اٹھا لیا ہے

اس نیم وصل سے یہ ترک تعلق اچھا

چاندی کو رکھ کے میں نے سونا اٹھا لیا ہے

اک تو پگار جیسے بچوں کی جیب خرچی

اوپر سے دوستوں کا خرچہ اٹھا لیا ہے

خوشبو کے عاشقوں کو تزئین باغ سے کیا

جو پھول بھی ذرا سا مہکا اٹھا لیا ہے

چبھ جائے سوئی بھی تو بھاگیں مجھے دکھانے

جیسے کہ میں نے سب کا ٹھیکا اٹھا لیا ہے

نانی نے ترک کر دی کیوں رسم قصہ گوئی

کیا چاند سے کسی نے چرخہ اٹھا لیا ہے

itni si ankh ne gham kitna utha liya hai

kashti ne apne andar dariya utha liya hai

is nim wasl se ye tark-e-taalluq achchha

chandi ko rakh ke main ne sona utha liya hai

ik to pagar jaise bachchon ki jeb kharchi

upar se doston ka kharcha utha liya hai

khushbu ke ashiqon ko tazin-e-bagh se kya

jo phul bhi zara sa mahka utha liya hai

chubh jae soi bhi to bhagen mujhe dikhane

jaise ke main ne sab ka theka utha liya hai

nani ne tark kar di kyun rasm-e-qissa goi

kya chand se kisi ne charkha utha liya hai