ہر گھڑی ہر وقت ہی بازار میں رہنا پڑا

ہر گھڑی ہر وقت ہی بازار میں رہنا پڑا

بیچنا تھا خود کو سو اخبار میں رہنا پڑا

ایک ہی تحریر کو پانی پہ لکھا بار بار

رہنا تھا بس اس لیے سنسار میں رہنا پڑا

خواہشیں تو تھیں کہ ہم بنیاد کا پتھر بنیں

ہائے کیسا جرم تھا دیوار میں رہنا پڑا

پھر کسی سے دوستی اس نے نہ میرے بعد کی

عمر بھر مجھ کو بھی پھر اغیار میں رہنا پڑا

وہ جو تھا خوشبو کی مانند اڑنا جس کا شوق تھا

بے بسی دیکھو اسے اشعار میں رہنا پڑا

ہم تصور کر نہ پائے واحدؔ اس تصویر کا

رات بھر ہم کو خیال یار میں رہنا پڑا

har ghari har waqt hi bazar mein rahna para

bechna tha khud ko so akhbar mein rahna para

ek hi tahrir ko pani pe likha bar bar

rahna tha bas is liye sansar mein rahna para

khwahishen to thin ke ham buniyad ka patthar banen

hae kaisa jurm tha diwar mein rahna para

phir kisi se dosti us ne na mere baad ki

umr bhar mujh ko bhi phir aghyar mein rahna para

wo jo tha khushbu ki manind urna jis ka shauq tha

be basi dekho use ashar mein rahna para

ham tasawwur kar na pae wahid is taswir ka

rat bhar ham ko khayal-e-yar mein rahna para