رت جگے میں بھی اک خماری ہے

رت جگے میں بھی اک خماری ہے

خواب ہلکا ہے نیند بھاری ہے

دیکھو کس کا نصیب بدلے گا

سانپ نے کینچلی اتاری ہے

ہوش مندوں کے اس خرابے میں

ہم دیوانوں کا رقص جاری ہے

اب اسے کون دیکھ سکتا ہے

ہم نے اس کی نظر اتاری ہے

خواب کا دام ہم لگائیں گے

عمر اک جاگتے گزاری ہے

اب تو شادی کی فکر ہے اس کی

ایک گڑیا سے عشق جاری ہے

یہ جنوں ٹھیک ہے مگر واحدؔ

ہوش کی اپنی ذمہ داری ہے

rut jage mein bhi ik khumari hai

khwab halka hai nind bhari hai

dekho kis ka nasib badlega

sanp ne kenchli utari hai

hosh mandon ke is kharabe mein

ham diwanon ka raqs jari hai

ab use kaun dekh sakta hai

ham ne us ki nazar utari hai

khwab ka dam ham lagaenge

umr ik jagte guzari hai

ab to shadi ki fikr hai us ki

ek guriya se ishq jari hai

ye junun thik hai magar wahid

hosh ki apni zimma dari hai