تھکے جسموں تھکی روحوں کے سب معنی بدلتے ہیں

تھکے جسموں تھکی روحوں کے سب معنی بدلتے ہیں

وصال ہجر کے موسم میں عریانی بدلتے ہیں

گھروں میں بیٹھے بیٹھے زنگ لگ جاتا ہے جسموں کو

چلو تالاب کا ٹھہرا ہوا پانی بدلتے ہیں

بدلتی دیکھی ہے دنیا فقط آنکھوں نے ہی اب تک

چلو اک کام کرتے ہیں کہ حیرانی بدلتے ہیں

بڑی مشکل سے دو مصرعوں میں کوئی ربط بنتا ہے

کبھی اولی بدلتے ہیں کبھی ثانی بدلتے ہیں

یقیناً یوں نہیں ہوتا مگر اک بد گمانی ہے

کوئی ہم سے کہے آؤ پریشانی بدلتے ہیں

تمہارا ذکر کرتے ہیں در و دیوار سے اکثر

بڑی مشکل سے ہم اس گھر کی ویرانی بدلتے ہیں

اسی موسم میں تو لگتا ہے پہرہ میری آنکھوں پر

یہی موسم تو دریاؤں کی طغیانی بدلتے ہیں

میاں واحدؔ کسی دن بلی ماراں ہو کے آتے ہیں

میاں نوشا سے مل کر یہ پشیمانی بدلتے ہیں

thake jismon thaki ruhon ke sab maani badalte hain

wisal-e-hijr ke mausam mein uryani badalte hain

gharon mein baithe baithe zang lag jata hai jismon ko

chalo talab ka thahra hua pani badalte hain

badalti dekhi hai duniya faqat ankhon ne hi ab tak

chalo ik kam karte hain ke hairani badalte hain

bari mushkil se do misron mein koi rabt banta hai

kabhi aula badalte hain kabhi sani badalte hain

yaqinan yun nahin hota magar ik bad gumani hai

koi ham se kahe ao pareshani badalte hain

tumhara zikr karte hain dar-o-diwar se aksar

bari mushkil se ham is ghar ki wirani badalte hain

isi mausam mein to lagta hai pahra meri ankhon par

yahi mausam to dariyaon ki tughyani badalte hain

miyan wahid kisi din billi maran ho ke ate hain

miyan nosha se mil kar ye pashemani badalte hain