Arooz is now on the App Store, for iPhone and iPad. Download →

All poetry

ٹھہرے جذبات کے دریا کو روانی دے کر

Varun Gagneja Wahid (b. 1980)

ٹھہرے جذبات کے دریا کو روانی دے کر

ہم نے کردار بچایا ہے کہانی دے کر

حد سے بڑھ جائے تو ہر چیز بری ہوتی ہے

میں نے اک فصل جلا ڈالی ہے پانی دے کر

اس نئے لہجے سے دل ڈوبنے لگتا ہے مرا

تم پکارو مجھے آواز پرانی دے کر

اب مجھے پیاس نبھانے کا ہنر آتا ہے

خاک صحرا میں اڑائی ہے جوانی دے کر

میرا رب کرتا ہے احسان مسلسل واحدؔ

شعر در شعر مجھے مصرع ثانی دے کر