میسر آ گئی ہے آگہی کیا

میسر آ گئی ہے آگہی کیا

رکے ہیں لوگ منزل آ گئی کیا

تمہارے ساتھ ہے سارا زمانہ

ہماری دوستی کیا دشمنی کیا

مروت جب دلوں سے کھو چکی ہو

قرابت کیا محلہ کیا گلی کیا

طبیعت درد کی جب ہم سفر ہو

پڑاؤ کیا سفر کیا خوش دلی کیا

میں دل کو کتنی وسعت دے سکوں گا

خفا ہو جائیں گے مجھ سے سبھی کیا

یہ سب احساس کی باتیں ہیں یارو

ستارے چاند سورج روشنی کیا

یہ مدت بعد کیسی ہچکیاں ہیں

صباؔ کی یاد ان کو آ گئی کیا

muyassar a gai hai agahi kya

ruke hain log manzil a gai kya

tumhare sath hai sara zamana

hamari dosti kya dushmani kya

murawwat jab dilon se kho chuki ho

qarabat kya mohalla kya gali kya

tabiat dard ki jab ham safar ho

parao kya safar kya khush dili kya

main dil ko kitni wusat de sakunga

khafa ho jaenge mujh se sabhi kya

ye sab ehsas ki baten hain yaro

sitare chand suraj raushni kya

ye muddat baad kaisi hichkiyan hain

saba ki yad un ko a gai kya