کس کو پار اتارا تم نے کس کو پار اتارو گے

کس کو پار اتارا تم نے کس کو پار اتارو گے

ملاحو تم پردیسی کو بیچ بھنور میں مارو گے

منہ دیکھے کی میٹھی باتیں سنتے اتنی عمر ہوئی

آنکھ سے اوجھل ہوتے ہوتے جی سے ہمیں بسارو گے

آج تو ہم کو پاگل کہہ لو پتھر پھینکو طنز کرو

عشق کی بازی کھیل نہیں ہے کھیلو گے تو ہارو گے

اہل وفا سے ترک تعلق کر لو پر اک بات کہیں

کل تم ان کو یاد کرو گے کل تم انہیں پکارو گے

ان سے ہم سے پیار کا رشتہ اے دل چھوڑو بھول چکو

وقت نے سب کچھ میٹ دیا ہے اب کیا نقش ابھارو گے

انشاؔ کو کسی سوچ میں ڈوبے در پر بیٹھے دیر ہوئی

کب تک اس کے بخت کے بدلے اپنے بال سنوارو گے

kis ko par utara tum ne kis ko par utaroge

mallaho tum pardesi ko bich bhanwar mein maroge

munh dekhe ki mithi baten sunte itni umr hui

ankh se ojhal hote hote ji se hamen bisaro ge

aj to ham ko pagal kah lo patthar phenko tanz karo

ishq ki bazi khel nahin hai kheloge to haroge

ahl-e-wafa se tark-e-taalluq kar lo par ik bat kahin

kal tum un ko yad karoge kal tum unhen pukaroge

un se ham se pyar ka rishta ai dil chhoro bhul chuko

waqt ne sab kuchh met diya hai ab kya naqsh ubharoge

insha ko kisi soch mein dube dar par baithe der hui

kab tak us ke bakht ke badle apne bal sanwaroge