رات کے خواب سنائیں کس کو رات کے خواب سہانے تھے

رات کے خواب سنائیں کس کو رات کے خواب سہانے تھے

دھندلے دھندلے چہرے تھے پر سب جانے پہچانے تھے

ضدی وحشی الہڑ چنچل میٹھے لوگ رسیلے لوگ

ہونٹ ان کے غزلوں کے مصرعے آنکھوں میں افسانے تھے

وحشت کا عنوان ہماری ان میں سے جو نار بنی

دیکھیں گے تو لوگ کہیں گے انشاؔ جی دیوانے تھے

یہ لڑکی تو ان گلیوں میں روز ہی گھوما کرتی تھی

اس سے ان کو ملنا تھا تو اس کے لاکھ بہانے تھے

ہم کو ساری رات جگایا جلتے بجھتے تاروں نے

ہم کیوں ان کے در پر اترے کتنے اور ٹھکانے تھے

rat ke khwab sunaen kis ko rat ke khwab suhane the

dhundle dhundle chehre the par sab jane pahchane the

ziddi wahshi alhar chanchal mithe log rasile log

hont un ke ghazlon ke misre ankhon mein afsane the

wahshat ka unwan hamari un mein se jo nar bani

dekhenge to log kahenge insha ji diwane the

ye larki to un galiyon mein roz hi ghuma karti thi

us se un ko milna tha to us ke lakh bahane the

ham ko sari rat jagaya jalte bujhte taron ne

ham kyun un ke dar par utre kitne aur thikane the