کل چودھویں کی رات تھی شب بھر رہا چرچا ترا

کل چودھویں کی رات تھی شب بھر رہا چرچا ترا

کچھ نے کہا یہ چاند ہے کچھ نے کہا چہرا ترا

ہم بھی وہیں موجود تھے ہم سے بھی سب پوچھا کیے

ہم ہنس دئیے ہم چپ رہے منظور تھا پردہ ترا

اس شہر میں کس سے ملیں ہم سے تو چھوٹیں محفلیں

ہر شخص تیرا نام لے ہر شخص دیوانا ترا

کوچے کو تیرے چھوڑ کر جوگی ہی بن جائیں مگر

جنگل ترے پربت ترے بستی تری صحرا ترا

ہم اور رسم بندگی آشفتگی افتادگی

احسان ہے کیا کیا ترا اے حسن بے پروا ترا

دو اشک جانے کس لیے پلکوں پہ آ کر ٹک گئے

الطاف کی بارش تری اکرام کا دریا ترا

اے بے دریغ و بے اماں ہم نے کبھی کی ہے فغاں

ہم کو تری وحشت سہی ہم کو سہی سودا ترا

ہم پر یہ سختی کی نظر ہم ہیں فقیر رہ گزر

رستہ کبھی روکا ترا دامن کبھی تھاما ترا

ہاں ہاں تری صورت حسیں لیکن تو ایسا بھی نہیں

اک شخص کے اشعار سے شہرہ ہوا کیا کیا ترا

بے درد سننی ہو تو چل کہتا ہے کیا اچھی غزل

عاشق ترا رسوا ترا شاعر ترا انشاؔ ترا

kal chaudhwin ki rat thi shab bhar raha charcha tira

kuchh ne kaha ye chand hai kuchh ne kaha chehra tira

ham bhi wahin maujud the ham se bhi sab puchha kiye

ham hans diye ham chup rahe manzur tha parda tira

is shahr mein kis se milen ham se to chhuten mahfilen

har shakhs tera nam le har shakhs diwana tira

kuche ko tere chhor kar jogi hi ban jaen magar

jangal tire parbat tire basti tiri sahra tira

ham aur rasm-e-bandagi ashuftagi uftadagi

ehsan hai kya kya tira ai husn-e-be parwa tira

do ashk jane kis liye palkon pe a kar tuk gae

altaf ki barish tiri ikram ka dariya tira

ai be daregh-o-be aman ham ne kabhi ki hai fughan

ham ko tiri wahshat sahi ham ko sahi sauda tira

ham par ye sakhti ki nazar ham hain faqir-e-rah guzar

rasta kabhi roka tira daman kabhi thama tira

han han tiri surat hasin lekin to aisa bhi nahin

ik shakhs ke ashar se shohra hua kya kya tira

be dard sunni ho to chal kahta hai kya achchhi ghazal

ashiq tira ruswa tira shayar tira insha tira