دریا رکا ہوا تھا مگر میں سفر میں تھا

دریا رکا ہوا تھا مگر میں سفر میں تھا

اک روشنی کا عکس بھی میرے ہنر میں تھا

اوڑھا ہوا تھا سچ کا لبادہ وجود نے

لیکن شعور جھوٹ کے اندھے نگر میں تھا

ہر راستے کی دھول پروں میں سمیٹ کر

انجان منزلوں کا پرندہ سفر میں تھا

بازار میں تھی ہنستے چراغوں کی روشنی

بجھتے ہوئے دیے کا دھواں میرے گھر میں تھا

کندہ تھا خواہشوں کا فسانہ فصیل پر

زندہ حقیقتوں کا لہو اک کھنڈر میں تھا

اتری تھی رات شہر میں آنسو لیے ہوئے

اک قافلہ سحر کا کہیں رہ گزار میں تھا

طاہرؔ مرے وجود کی بولی تو دے گیا

شاید وہ اپنی ذات کے نیلام گھر میں تھا

dariya ruka hua tha magar main safar mein tha

ik raushni ka aks bhi mere hunar mein tha

orha hua tha sach ka labada wajud ne

lekin shuur jhut ke andhe nagar mein tha

har raste ki dhul paron mein samet kar

anjan manzilon ka parinda safar mein tha

bazar mein thi hanste charaghon ki raushni

bujhte hue diye ka dhuan mere ghar mein tha

kanda tha khwahishon ka fasana fasil par

zinda haqiqaton ka lahu ik khandar mein tha

utri thi rat shahr mein ansu liye hue

ik qafila sahar ka kahin rah guzar mein tha

tahir mire wajud ki boli to de gaya

shayad wo apni zat ke nilam ghar mein tha