کیسا لہجہ تھا کس حال میں وہ رہی ایک ہی سانس میں

کیسا لہجہ تھا کس حال میں وہ رہی ایک ہی سانس میں

کہنے والی کہانی مری کہہ گئی ایک ہی سانس میں

یہ بھلا کیا کہ اک ایک گھونٹ اپنے اندر اترتا رہے

مے اگر تو نے پینی ہے تو ساری پی ایک ہی سانس میں

ایک ہی سانس میں ہے سمایا ہوا یہ جہاں اے خدا

ہم نے ساری خدائی تری دیکھ لی ایک ہی سانس میں

جتنے بھی اہل محفل تھے منہ وہ مرا دیکھتے رہ گئے

بزم میں ان کی تعریف کچھ ایسے کی ایک ہی سانس میں

ان کے ہونٹوں کا لمس ایسے چہرے پہ محسوس ہوتا رہا

ہم نے ساری حیاتیں یوں ہی کاٹ لیں ایک ہی سانس میں

ایک ہی سانس میں ہم نے طاہرؔ سبھی کچھ کہا آپ سے

جو بھی کہنا ہے کہہ دیجیے آپ بھی ایک ہی سانس میں

kaisa lahja tha kis hal mein wo rahi ek hi sans mein

kahne wali kahani miri kah gai ek hi sans mein

ye bhala kya ke ik ek ghunt apne andar utarta rahe

mai agar tu ne pini hai to sari pi ek hi sans mein

ek hi sans mein hai samaya hua ye jahan ai khuda

ham ne sari khudai tiri dekh li ek hi sans mein

jitne bhi ahl-e-mahfil the munh wo mira dekhte rah gae

bazm mein un ki taarif kuchh aise ki ek hi sans mein

un ke honton ka lams aise chehre pe mahsus hota raha

ham ne sari hayatin yun hi kat len ek hi sans mein

ek hi sans mein ham ne tahir sabhi kuchh kaha ap se

jo bhi kahna hai kah dijiye ap bhi ek hi sans mein