فلک سے جو ہوئے دھرتی کی نذر سادہ لوگ

فلک سے جو ہوئے دھرتی کی نذر سادہ لوگ

انہی کے غم سے ہیں واقف یہ بے لبادہ لوگ

میں اپنے آپ کو اب ڈھونڈھ بھی نہیں سکتا

مرے جنازے میں ہیں اس قدر زیادہ لوگ

انہی میں میں بھی ہوں شامل سو تو نہیں ملتا

بنا کے توڑنے والے ہیں جو ارادہ لوگ

کہ چیر ڈالا گیا پہلے بے گناہ مجھے

مرے وجود کا چنتے ہیں اب برادہ لوگ

رفیق چھوڑ کے دل میں جو رکھیں دشمن کو

کہ میرے جیسے کہاں ہوں گے دل کشادہ لوگ

جلا رہا ہوں میں خود کو کچھ اس لیے طاہرؔ

کریں گے دیپ کی اس لو سے استفادہ لوگ

falak se jo hue dharti ki nazr-e-sada log

unhi ke gham se hain waqif ye be labada log

main apne ap ko ab dhundh bhi nahin sakta

mire janaze mein hain is qadar ziyada log

unhi mein main bhi hun shamil so to nahin milta

bana ke torne wale hain jo irada log

ke chir dala gaya pahle be gunah mujhe

mire wajud ka chunte hain ab burada log

rafiq chhor ke dil mein jo rakhen dushman ko

ke mere jaise kahan honge dil kushada log

jala raha hun main khud ko kuchh is liye tahir

karenge dip ki is lau se istifada log