آسماں پر کالے بادل چھا گئے

آسماں پر کالے بادل چھا گئے

گھر کے اندر آئنے دھندلا گئے

کیا غضب ہے ایک بھی کوئل نہیں

سب بغیچے آم کے منجرا گئے

گھٹتے بڑھتے فاصلوں کے درمیاں

دفعتاً دو راستے بل کھا گئے

ڈوبتا ہے آ کے سورج ان کے پاس

وہ دریچے میرے دل کو بھا گئے

شہر کیا دنیا بدل کر دیکھ لو

پھر کہو گے ہم تو اب اکتا گئے

سامنے تھا بے رخی کا آسماں

اس لئے واپس زمیں پر آ گئے

یاد آیا کچھ گرا تھا ٹوٹ کر

بے خودی میں خود سے کل ٹکرا گئے

حرمت لوح و قلم جاتی رہی

کس طرح کے لوگ ادب میں آ گئے

ہم ہیں مجرم آپ ملزم بھی نہیں

آپ کس انجام سے گھبرا گئے

ہو گئی ہے شعلہ زن ہر شاخ گل

بڑھ رہے تھے ہاتھ جو تھرا گئے

دھنس گئے جو رک گئے تھے راہ میں

دیکھتے تھے مڑ کے جو پتھرا گئے

گھر کی تنہائی جب آنگن ہو گئی

یہ ستارے کیا قیامت ڈھا گئے

تھے مخاطب جسم لہجے بے شمار

جاں بلب ارماں خلشؔ غزلا گئے

asman par kale badal chha gae

ghar ke andar aine dhundla gae

kya ghazab hai ek bhi koyal nahin

sab bagheche am ke manjara gae

ghatte barhte faslon ke darmiyan

dafatan do raste bal kha gae

dubta hai a ke suraj un ke pas

wo dariche mere dil ko bha gae

shahr kya duniya badal kar dekh lo

phir kahoge ham to ab ukta gae

samne tha be rukhi ka asman

is liye wapas zamin par a gae

yad aya kuchh gira tha tut kar

be khudi mein khud se kal takra gae

hurmat-e-lauh-o-qalam jati rahi

kis tarah ke log adab mein a gae

ham hain mujrim ap mulzim bhi nahin

ap kis anjam se ghabra gae

ho gai hai shola zan har shakh-e-gul

barh rahe the hath jo tharra gae

dhans gae jo ruk gae the rah mein

dekhte the mur ke jo pathra gae

ghar ki tanhai jab angan ho gai

ye sitare kya qayamat dha gae

the mukhatib jism lahje be shumar

jan balb arman khalish ghazla gae