خود کو خودی کا آئنہ دکھلا رہا ہوں میں

خود کو خودی کا آئنہ دکھلا رہا ہوں میں

اپنا حریف آپ بنا جا رہا ہوں میں

قسمت کی پستیوں کی حدیں ختم ہو چکیں

اب رفعتوں کی سمت اڑا جا رہا ہوں میں

ناکام آرزو ہوں مگر اف یقین عشق

دانستہ پھر فریب وفا کھا رہا ہوں

مہر سکوت لب پہ ہے بہکے ہوئے قدم

اے بے خودی پھر آج کدھر جا رہا ہوں میں

پھر دیکھتا ہوں چہرۂ ماضی کے خد و خال

ساقی سنبھال ہوش میں پھر آ رہا ہوں میں

رک جائے جس کے شور سے دشت و جبل کی سانس

اس سیل رنج و غم میں بہا جا رہا ہوں میں

جانے کو ہوں احاطہ عالم سے دور تر

بس چند روز تم کو نظر آ رہا ہوں میں

شمس و قمر ہیں راہ میں ذرات کی طرح

کس کی تجلیوں میں گھرا جا رہا ہوں میں

تھا جو خیال تیری جفاؤں سے پیشتر

دل کو اسی خیال سے بہلا رہا ہوں میں

بڑھ بڑھ کے راجؔ میرے قدم لے رہی ہے موت

کس زندگی کی سمت بڑھا جا رہا ہوں میں

khud ko khudi ka aina dikhla raha hun main

apna harif ap bana ja raha hun main

qismat ki pastiyon ki haden khatm ho chuken

ab rifaton ki samt ura ja raha hun main

nakam-e-arzu hun magar uf yaqin-e-ishq

danista phir fareb-e-wafa kha raha hun

mehr-e-sukut-e-lab pe hai bahke hue qadam

ai be khudi phir aj kidhar ja raha hun main

phir dekhta hun chehra-e-mazi ke khad-o-khal

saqi sambhal hosh mein phir a raha hun main

ruk jae jis ke shor se dasht-o-jabal ki sans

is sail-e-ranj-o-gham mein baha ja raha hun main

jane ko hun ihata alam se dur tar

bas chand roz tum ko nazar a raha hun main

shams-o-qamar hain rah mein zarrat ki tarah

kis ki tajalliyon mein ghira ja raha hun main

tha jo khayal teri jafaon se peshtar

dil ko isi khayal se bahla raha hun main

barh barh ke raj mere qadam le rahi hai maut

kis zindagi ki samt barha ja raha hun main