Arooz is now on the App Store, for iPhone and iPad. Download →

All poetry

بدلا ہوا ہے رنگ گلستاں مرے لیے

Baldev Raaj (b. 1924)

بدلا ہوا ہے رنگ گلستاں مرے لیے

خوں رو رہی ہے چشم بہاراں مرے لیے

فیض جنون شوق کے قربان جائیے

وسعت ہے دو جہان کی زنداں مرے لیے

سب اہل دل ہیں تیری نگاہوں سے فیضیاب

اب تو کہاں ہے صرف مری جاں مرے لیے

میں خود ہی چھوڑ جاؤں گا یہ محفل حیات

کیوں ہو رہے ہو اتنے پریشاں مرے لیے

وہ زندگی جسے تری محفل میں بار تھا

اب ہو گئی ہے خواب گریزاں مرے لیے

اے میرے چاک چاک گریباں سے بے خبر

تو بھی پھرے گا چاک گریباں مرے لیے

پھولوں کے ناز اہل چمن کو رہیں نصیب

خنداں ہیں خار ہائے بیاباں مرے لیے