میرے ارمانوں کو پامال زیاں رہنے بھی دے

میرے ارمانوں کو پامال زیاں رہنے بھی دے

شوق منزل کو شریک کارواں رہنے بھی دے

وعدہ و پیمان الفت کو نہ دے لفظوں کا رنگ

درد سے لبریز نالوں کو جواں رہنے بھی دے

دیکھ مجھ کو حسرت آلودہ نگاہوں سے نہ دیکھ

یہ فسوں یہ شوخ انداز بیاں رہنے بھی دے

حائل الفت اگر ہے زندگی کی کشمکش

زندگی کی کشمکش کو درمیاں رہنے بھی دے

میں جہاں ہوں جس طرح ہوں خوب ہوں دل شاد ہوں

حاصل الفت ہیں یہ بربادیاں رہنے بھی دے

وہ گزشتہ عیش و عشرت وہ نشاط زندگی

خواب تھا اس خواب کی رنگینیاں رہنے بھی دے

دوست مجبور وفا ہو کر نہ کھا دل کا فریب

زندگی پر کامرانی کا گماں رہنے بھی دے

نقش غم کو کیوں مٹاتی ہے دل غمگین سے

یہ مری خونیں بہاریں بے خزاں رہنے بھی دے

mere armanon ko pamal-e-ziyan rahne bhi de

shauq-e-manzil ko sharik-e-karwan rahne bhi de

waada-o-paiman-e-ulfat ko na de lafzon ka rang

dard se labrez nalon ko jawan rahne bhi de

dekh mujh ko hasrat aluda nigahon se na dekh

ye fusun ye shokh andaz-e-bayan rahne bhi de

hail-e-ulfat agar hai zindagi ki kashmakash

zindagi ki kashmakash ko darmiyan rahne bhi de

main jahan hun jis tarah hun khub hun dil shad hun

hasil-e-ulfat hain ye barbadiyan rahne bhi de

wo guzishta aish-o-ishrat wo nishat-e-zindagi

khwab tha is khwab ki ranginiyan rahne bhi de

dost majbur-e-wafa ho kar na kha dil ka fareb

zindagi par kamrani ka guman rahne bhi de

naqsh-e-gham ko kyun mitati hai dil-e-ghamgin se

ye miri khunin baharen be khizan rahne bhi de