میں جی رہا ہوں تیرا سہارا لیے بغیر

میں جی رہا ہوں تیرا سہارا لیے بغیر

یہ زہر پی رہا ہوں گوارا کئے بغیر

بکتا نہ کاش عشق کی قیمت لیے بغیر

میں ان کا ہو گیا انہیں اپنا کئے بغیر

واقف تو ہوں وفا کے نتیجے سے ہم نشیں

بنتی نہیں ہے ان پہ بھروسا کئے بغیر

کیا زندگی ہے اہل گلستاں کی زندگی

گل ہنس رہے ہیں چاک گریباں سیے بغیر

دن رات ہم نے غم کی حفاظت تو کی مگر

دنیا نہ رہ سکی ہمیں رسوا کئے بغیر

مرنے کی آرزو مجھے مدت سے ہے مگر

لیکن یہ کام ہو نہیں سکتا جئے بغیر

ان کی نگاہ مست کے صدقے میں مدتوں

اک بے خودی کا دور رہا ہے پئے بغیر

برق چمن حدود چمن سے نکل کے دیکھ

تاریک ایک اور بھی گھر ہے دیے بغیر

اے راجؔ راس آ نہ سکی محفل حیات

ہم آ گئے تھے کس کی اجازت لئے بغیر

main ji raha hun tera sahara liye baghair

ye zahr pi raha hun gawara kiye baghair

bikta na kash ishq ki qimat liye baghair

main un ka ho gaya unhen apna kiye baghair

waqif to hun wafa ke natije se ham nashin

banti nahin hai un pe bharosa kiye baghair

kya zindagi hai ahl-e-gulistan ki zindagi

gul hans rahe hain chak-e-gareban saye baghair

din rat ham ne gham ki hifazat to ki magar

duniya na rah saki hamen ruswa kiye baghair

marne ki arzu mujhe muddat se hai magar

lekin ye kam ho nahin sakta jiye baghair

un ki nigah-e-mast ke sadqe mein muddaton

ik be khudi ka daur raha hai piye baghair

barq-e-chaman hudud-e-chaman se nikal ke dekh

tarik ek aur bhi ghar hai diye baghair

ai raj ras a na saki mahfil-e-hayat

ham a gae the kis ki ijazat liye baghair