مرے سکون کی دنیا میں اضطرار نہیں

مرے سکون کی دنیا میں اضطرار نہیں

نہیں نہیں مجھے اب تیرا انتظار نہیں

وہ بے وفائی کے قائل میں جاں نثاری کا

کسی کو اپنی طبیعت پہ اختیار نہیں

سمجھ سکے کوئی کیا میرے ظرف عالی کو

پئے ہیں میکدے لیکن ذرا خمار نہیں

تری نگاہ سے گر کر یقیں ہوا مجھ کو

جہاں میں کوئی کسی کا بھی غم گسار نہیں

مرے خفیف تبسم پہ بھولنے والو

میں کامگار نہیں ہوں میں کامگار نہیں

ہیں دل سے ترک محبت کے مشورے لیکن

تمہیں بھلا بھی سکوں گا یہ اعتبار نہیں

معاملے میں محبت کے بد گمان ہوں راجؔ

وہ کیا ہیں مجھ کو خدا کا بھی اعتبار نہیں

mire sukun ki duniya mein iztirar nahin

nahin nahin mujhe ab tera intizar nahin

wo be wafai ke qail mein jan nisari ka

kisi ko apni tabiat pe ikhtiyar nahin

samajh sake koi kya mere zarf-e-ali ko

piye hain maikade lekin zara khumar nahin

tiri nigah se gir kar yaqin hua mujh ko

jahan mein koi kisi ka bhi gham gusar nahin

mire khafif tabassum pe bhulne walo

main kamgar nahin hun main kamgar nahin

hain dil se tark-e-mohabbat ke mashware lekin

tumhen bhala bhi sakunga ye etibar nahin

muamle mein mohabbat ke bad guman hun raj

wo kya hain mujh ko khuda ka bhi etibar nahin