گلوں کو چوم کر آئی صبا سی لگتی تھی

گلوں کو چوم کر آئی صبا سی لگتی تھی

تھی اک نظر پہ معطر ہوا سی لگتی تھی

میں زخم زخم تھا لیکن گلاب ہاتھوں میں

بڑی تھی چوٹ تو لیکن ذرا سی لگتی تھی

وہ ترش گو لب جاں بخش بھی تھا کیا کہئے

کہ تلخ بات بھی اس کی دوا سی لگتی تھی

ستم کو حسن ستم کر گیا وہی ورنہ

یہی تھی زندگی لیکن سزا سی لگتی تھی

مری تڑپ کو سمجھتا تھا اک عبادت وہ

مجھے بھی اس کی محبت دعا سی لگتی تھی

چلو وہ آنکھ میں پانی تو دے گیا ورنہ

یہ سانس اندھے کنویں میں صدا سی لگتی تھی

gulon ko chum kar ai saba si lagti thi

thi ik nazar pe muattar hua si lagti thi

main zakhm zakhm tha lekin gulab hathon mein

bari thi chot to lekin zara si lagti thi

wo tursh go lab-e-jan bakhsh bhi tha kya kahiye

ke talkh bat bhi us ki dawa si lagti thi

sitam ko husn sitam kar gaya wahi warna

yahi thi zindagi lekin saza si lagti thi

miri tarap ko samajhta tha ik ibadat wo

mujhe bhi us ki mohabbat dua si lagti thi

chalo wo ankh mein pani to de gaya warna

ye sans andhe kuen mein sada si lagti thi