شہر میں بن کے محبت کا گداگر مانگوں

شہر میں بن کے محبت کا گداگر مانگوں

مجھ کو مانگے سے ملے وہ تو میں در در مانگوں

دہر کی دار پہ جھولوں بھی تو کیسے جھولوں

غم دنیا بھی ترے قد کے برابر مانگوں

اک طرف دل کہ ترے غم سے ابھرتا ہی نہیں

اک طرف میں کہ تری دید کا گوہر مانگوں

تیری یادوں کی اڑانیں بھی بہت خوب مگر

دل یہ کہتا ہے ترے لمس کا شہ پر مانگوں

زندگی میری ہے کشکول تہی کی صورت

اس بھکاری سے میں مانگوں بھی تو کیا زر مانگوں

ایک پتھر تری راہوں سے ہٹا ہوں جب سے

آج یہ حال کہ ہر پاؤں سے ٹھوکر مانگوں

shahr mein ban ke mohabbat ka gadagar mangun

mujh ko mange se mile wo to main dar dar mangun

dahr ki dar pe jhulun bhi to kaise jhulun

gham-e-duniya bhi tire qad ke barabar mangun

ik taraf dil ke tire gham se ubharta hi nahin

ik taraf main ke tiri did ka gauhar mangun

teri yadon ki uranen bhi bahut khub magar

dil ye kahta hai tire lams ka shah par mangun

zindagi meri hai kashkol tahi ki surat

is bhikari se main mangun bhi to kya zar mangun

ek patthar tiri rahon se hata hun jab se

aj ye hal ke har paon se thokar mangun