زندگی اپنی ہوئی یار کی فطرت کی طرح

زندگی اپنی ہوئی یار کی فطرت کی طرح

ہم بھی کل ہوں کہ نہ ہوں اس کی عنایت کی طرح

وقت ہم کو یہ برے دن نہ دکھاتا اے کاش

ہم بھی اٹھ جاتے زمانے سے محبت کی طرح

ہم تو ہر لمحے کو دیتے رہے سانسوں کا حساب

ہم پہ ٹوٹا ہے ہر اک لمحہ قیامت کی طرح

گل کھلائے گا یہ مقتول لہو دھرتی پر

کسی رخسار پہ چڑھتی ہوئی رنگت کی طرح

لوگ کہتے ہیں نہ کیوں بھول گیا میں اس کو

وہ کہ تھا جو مری بنیادی ضرورت کی طرح

زندگی تو کسی ساغر میں ڈھلی تو ہوتی

ہم تو پی لیتے تجھے جام شہادت کی طرح

zindagi apni hui yar ki fitrat ki tarah

ham bhi kal hun ke na hun us ki inayat ki tarah

waqt ham ko ye bure din na dikhata ai kash

ham bhi uth jate zamane se mohabbat ki tarah

ham to har lamhe ko dete rahe sanson ka hisab

ham pe tuta hai har ik lamha qayamat ki tarah

gul khilaega ye maqtul lahu dharti par

kisi rukhsar pe charhti hui rangat ki tarah

log kahte hain na kyun bhul gaya main us ko

wo ke tha jo miri buniyadi zarurat ki tarah

zindagi to kisi saghar mein dhali to hoti

ham to pi lete tujhe jam-e-shahadat ki tarah