اس سے پہلے کہ سہاروں کو تو عادت کر لے

اس سے پہلے کہ سہاروں کو تو عادت کر لے

دل بغیر اس کے سنبھلنے کی بھی ہمت کر لے

فن یکجائی کا ماہر کوئی آئے تب تک

ہے کوئی جو مرے ٹکڑوں کی حفاظت کر لے

کتنا سادہ ہے تو اس میں بھی رضا چاہتا ہے

مجھ کو برباد کرے گا ہے اجازت کر لے

نیند نے مان لیا جو مری آنکھوں کے خلاف

تیرے خوابوں نے کہا تھا کہ بغاوت کر لے

کتنا آساں ہے ہنر آنکھ کی دشواری کا

زندگی بھر جسے رونا ہو محبت کر لے

is se pahle ke saharon ko to adat kar le

dil baghair us ke sambhalne ki bhi himmat kar le

fan yakjai ka mahir koi ae tab tak

hai koi jo mire tukron ki hifazat kar le

kitna sada hai to is mein bhi raza chahta hai

mujh ko barbad karega hai ijazat kar le

nind ne man liya jo miri ankhon ke khilaf

tere khwabon ne kaha tha ke baghawat kar le

kitna asan hai hunar ankh ki dushwari ka

zindagi bhar jise rona ho mohabbat kar le