جو چاہیے تھا وہ نہ ملا آسمان سے

جو چاہیے تھا وہ نہ ملا آسمان سے

ٹھکرا کے لوٹ آئے ستاروں کو شان سے

یہ سوچ کر کے چھاؤں میں بیٹھا نہ میں کبھی

ٹوٹے نہ حوصلہ ترا میری تھکان سے

تلووں کو چاٹنے سے ہر اک کام بن پڑا

محنت نہ دے سکی وہ جو پایا زبان سے

لیکن وہ زخم بھر گیا دہشت نہیں گئی

سب یاد آنے لگتا ہے اس کے نشان سے

ہم سے ذرا سا آگے اگر ہو بھی تم تو کیا

ہم اپنے آپ سے بنے تم خاندان سے

لوٹا جو خالی ہاتھ تو میں مسکرا دیا

امید بھی نہیں تھی تیرے آستان سے

اے دل تو راہ عشق کی ٹھوکر سے لے سبق

جو ہو گیا سو ہو گیا آئندہ دھیان سے

سر سے بھٹک رہا ہے تمہارا ہر ایک لفظ

دل کیا سنے گا جو نہ سنا جائے کان سے

jo chahiye tha wo na mila asman se

thukra ke laut ae sitaron ko shan se

ye soch kar ke chhaon mein baitha na main kabhi

tute na hausla tira meri thakan se

talwon ko chatne se har ik kam ban para

mehnat na de saki wo jo paya zaban se

lekin wo zakhm bhar gaya dahshat nahin gai

sab yad ane lagta hai us ke nishan se

ham se zara sa age agar ho bhi tum to kya

ham apne ap se bane tum khandan se

lauta jo khali hath to main muskura diya

ummid bhi nahin thi tere astan se

ai dil to rah-e-ishq ki thokar se le sabaq

jo ho gaya so ho gaya ainda dhyan se

sar se bhatak raha hai tumhara har ek lafz

dil kya sunega jo na suna jae kan se