اپنے سینے میں دبائے ہوئے غم رکھا ہے

اپنے سینے میں دبائے ہوئے غم رکھا ہے

ہم نے ہر حال میں الفت کا بھرم رکھا ہے

تجھ سے دوری کا نہ احساس کبھی ہو مجھ کو

دل میں یادوں کو تری یوںہی صنم رکھا ہے

دیکھ لے ایک نظر دم تو سکوں سے نکلے

تیرے بیمار کا اٹکا ہوا دم رکھا ہے

رب کی مرضی کے بنا ہوتا نہیں ہے کچھ بھی

اس نے ہر شخص کو محتاج کرم رکھا ہے

تو ہمیں یاد کرے یا نہ کرے پر ہم نے

ہر گھڑی یاد تجھے تیری قسم رکھا ہے

ہم کو تلوار کی پیش آتی ضرورت کیسے

جیب میں ہم نے ہمہ وقت قلم رکھا ہے

میں سمجھتا ہوں کہ سب سوچ سمجھ کر فیصلؔ

تم نے دہلیز محبت پہ قدم رکھا ہے

apne sine mein dabae hue gham rakha hai

ham ne har hal mein ulfat ka bharam rakha hai

tujh se duri ka na ehsas kabhi ho mujh ko

dil mein yadon ko tiri yunhi sanam rakha hai

dekh le ek nazar dam to sukun se nikle

tere bimar ka atka hua dam rakha hai

rab ki marzi ke bina hota nahin hai kuchh bhi

us ne har shakhs ko mohtaj-e-karam rakha hai

tu hamen yad kare ya na kare par ham ne

har ghari yad tujhe teri qasam rakha hai

ham ko talwar ki pesh ati zarurat kaise

jeb mein ham ne hama waqt qalam rakha hai

main samajhta hun ke sab soch samajh kar faisal

tum ne dahliz mohabbat pe qadam rakha hai