جب آئنوں کو بھی دھندلا دکھائی دینے لگا

جب آئنوں کو بھی دھندلا دکھائی دینے لگا

میں اپنے آپ ہی اپنی صفائی دینے لگا

صدا غریب کی آئے کہاں سے کانوں تک

امیر شہر کو اونچا سنائی دینے لگا

خطا یہ اس کی نہیں تھی صلہ بھلائی کا تھا

وہ جاتے وقت جو مجھ کو برائی دینے لگا

مخالفوں کو مرے فتح کیوں نہ ہوتی نصیب

مرے خلاف گواہی جو بھائی دینے لگا

مریض ہجر ہوں آرام وصل سے ہوگا

طبیب کیا مرے غم کی دوائی دینے لگا

شب فراق جو تنہائیوں نے تنگ کیا

میں اپنے یار کو فیصلؔ دہائی دینے لگا

jab ainon ko bhi dhundla dikhai dene laga

main apne ap hi apni safai dene laga

sada gharib ki ae kahan se kanon tak

amir-e-shahr ko uncha sunai dene laga

khata ye us ki nahin thi sila bhalai ka tha

wo jate waqt jo mujh ko burai dene laga

mukhalifon ko mire fath kyun na hoti nasib

mire khilaf gawahi jo bhai dene laga

mariz-e-hijr hun aram wasl se hoga

tabib kya mire gham ki dawai dene laga

shab-e-firaq jo tanhaiyon ne tang kiya

main apne yar ko faisal duhai dene laga