حسرت دیدۂ شب تاب لئے بیٹھے ہیں

حسرت دیدۂ شب تاب لئے بیٹھے ہیں

اپنی آنکھوں میں ہم اک خواب لئے بیٹھے ہیں

شہر ہستی میں کچھ ایسے بھی ہمیں لوگ ملے

اپنی فطرت میں جو گرداب لئے بیٹھے ہیں

ہم نے خود کو بھی کھنگالا ہے سمندر کی طرح

ہاتھ میں گوہر نایاب لئے بیٹھے ہیں

مجھ پہ اللہ کی رحمت ہے جو زندہ ہوں میں

ورنہ خنجر مرے احباب لئے بیٹھے ہیں

حق بیانی سے جو ڈرتے ہیں سر محفل وہ

ذہن میں منبر و محراب لئے بیٹھے ہیں

زعم یہ ہے کہ انہیں کو ہی ملے گی جنت

جو تباہی کے ہر اسباب لئے بیٹھے ہیں

درد کیا سمجھیں گے ساحلؔ وہ سیہ راتوں کا

اپنے پہلو میں جو مہتاب لئے بیٹھے ہیں

hasrat-e-dida-e-shab tab liye baithe hain

apni ankhon mein ham ik khwab liye baithe hain

shahr-e-hasti mein kuchh aise bhi hamen log mile

apni fitrat mein jo girdab liye baithe hain

ham ne khud ko bhi khangala hai samundar ki tarah

hath mein gauhar-e-nayab liye baithe hain

mujh pe allah ki rahmat hai jo zinda hun main

warna khanjar mire ahbab liye baithe hain

haq bayani se jo darte hain sar-e-mahfil wo

zehn mein mimbar-o-mehrab liye baithe hain

zaam ye hai ke unhen ko hi milegi jannat

jo tabahi ke har asbab liye baithe hain

dard kya samjhenge sahil wo siyah raton ka

apne pahlu mein jo mahtab liye baithe hain