زمیں پہ جب کبھی جلوے نظر کے دیکھتے ہیں

زمیں پہ جب کبھی جلوے نظر کے دیکھتے ہیں

ہم آسمان سے اکثر اتر کے دیکھتے ہیں

بلا کا حسن ہے اس کی سبک اداؤں میں

جو بے نیاز ہیں وہ بھی ٹھہر کے دیکھتے ہیں

یہ حوصلہ ہے ہمارا کہ بال و پر اپنے

اڑان بھرنے سے پہلے کتر کے دیکھتے ہیں

ضرور دل میں کوئی خواہش سفر ہوگی

وہ بار بار ہمیں کیوں سنور کے دیکھتے ہیں

انہی کو ملتی ہے ہر گام پہ نئی منزل

تمام عمر جو امکاں سفر کے دیکھتے ہیں

وہ ناتواں ہو یا غازی یا اہل ثروت ہو

تمام لوگ تمہیں آہ بھر کے دیکھتے ہیں

جسے زمانہ سمجھتا ہے پر خطر ساحلؔ

ہم ایسی راہ سے اکثر گزر کے دیکھتے ہیں

zamin pe jab kabhi jalwe nazar ke dekhte hain

ham asman se aksar utar ke dekhte hain

bala ka husn hai us ki subuk adaon mein

jo be niyaz hain wo bhi thahar ke dekhte hain

ye hausla hai hamara ke bal-o-par apne

uran bharne se pahle katar ke dekhte hain

zarur dil mein koi khwahish-e-safar hogi

wo bar bar hamen kyun sanwar ke dekhte hain

unhi ko milti hai har gam pe nai manzil

tamam umr jo imkan safar ke dekhte hain

wo natawan ho ya ghazi ya ahl-e-sarwat ho

tamam log tumhen ah bhar ke dekhte hain

jise zamana samajhta hai pur khatar sahil

ham aisi rah se aksar guzar ke dekhte hain