عالم سجدہ ہے میرا ایک عالم نور کا

عالم سجدہ ہے میرا ایک عالم نور کا

سجدہ گہ پر میری دھوکا ہو رہا ہے طور کا

ایک عالم ہم نوا ہے صاحب مقدور کا

ساتھ دیتا ہے کہاں کوئی کسی مجبور کا

شدت احساس تنہائی کی ہیں ہمدردیاں

درد بڑھ جاتا ہے اکثر رات کو رنجور کا

تیر نے ناپی ہیں شاید زخم کی گہرائیاں

علم بے چارے کو کیا ہے صدمۂ مستور کا

شمع روشن ہے کہاں اس کا پتہ چلتا نہیں

پر نظر کو ہے یقیں موجودگیٔ نور کا

ہیں کبھی نظریں تمنا پر کبھی امید پر

یعنی حسرت‌ ناک عالم ہے دل مجبور کا

تجھ میں اور تیرے تصور میں ذرا سا فرق ہے

ایک منظر پاس کا ہے ایک منظر دور کا

سرفرازی و نوازش کا سنا ہے صرف نام

اے ذکیؔ ان سے تو رشتہ بھی نہیں ہے دور کا

alam-e-sajda hai mera ek alam nur ka

sajda gah par meri dhoka ho raha hai tur ka

ek alam ham nawa hai sahab-e-maqdur ka

sath deta hai kahan koi kisi majbur ka

shiddat-e-ehsas-e-tanhai ki hain hamdardiyan

dard barh jata hai aksar rat ko ranjur ka

tir ne napi hain shayad zakhm ki gahraiyan

ilm be chare ko kya hai sadma-e-mastur ka

sham-e-raushan hai kahan us ka pata chalta nahin

par nazar ko hai yaqin maujudgi-e-nur ka

hain kabhi nazren tamanna par kabhi ummid par

yaani hasrat nak alam hai dil majbur ka

tujh mein aur tere tasawwur mein zara sa farq hai

ek manzar pas ka hai ek manzar dur ka

sarfarazi-o-nawazish ka suna hai sirf-e-nam

ai zaki un se to rishta bhi nahin hai dur ka